Wia dis foto come from, SDI Productions/Getty Images
United States wan impose stronger limits on how long foreign students, cultural exchange visitors, professors and journalists fit stay in di United States, to stop visa abuse and tighten di nation security.
Inside one proposed rule wey di US Department of Homeland Security publish on Wednesday, dem tok say Donald Trump administration no go allow foreign students to stay for more dan four years on student visas in di United States.
Dem also tok say, dem go limit US stay for foreign journalists to just 240 days, but dem fit apply to extend am to extra 240 days.
“Trump Administration announce propose rule wey go limit di length of time certain visa holders – including foreign students– go dey allowed to stay for di United States, e go stop visa abuse and increase di Department of Homeland Security ability to properly vet and oversee dis individuals,” di statement tok.
“For too long, past administrations don allow foreign students and oda visa holders to remain in di U.S. virtually indefinitely, dis dey pose safety risks, cost untold amount of taxpayer dollars, and e dey disadvantaging to U.S. citizens.”
Wia dis foto come from, Getty Images
Since, president Donald Trump, don enta office e don dey try stop illegal immigration in di United States.
Under dis proposed regulation, F and J visas applicants, international students, journalists, professors and cultural exchange visitors in di US go face limited stay duration for US and DHS go thorough check dia social media pipo dem go fit stay for US.
Bifor now, US bin dey limit di stay period for foreign students and journalists on assignment, but e no dey pass 10 years.
“Dis new proposed rule go end dat abuse once and for all by limiting di amount of time certain visa holders go dey allowed to remain in di U.S., easing di burden on di federal goment to properly oversee foreign students and dia history,” di statement tok.
“Since 1978, foreign students (F visa holders) dey enta into di U.S. for unspecified period wey pio sabi as “duration of status.” Unlike oda visas issued, wit “duration of status” designation dey allowed to remain in di U.S. for an unlimited amount of time without screening and vetting.”
Dis announcement na days afta universities don start dia academic years and many record low enrollment of foreign students afta Trump administration cancel more dan 6,000 international student visas becos of violations of US law and overstay.
Di agency bin expalin say majority of di violations na assault, driving under di influence (DUI), burglary and “support for terrorism”.
Trump administration kotinu to crackdown on immigration and international students blaming dem for supporting terrorism and using tax payers money without any evidence.